انا والكتيبة .. بقلم : يسرى النابتي

انا والكتيبة حكاية طويلة حكاية بدات ملي انا عمري 3 سنين . تحكيلي أمي كيفاه كي كنت صغيرة نبدا نكتب في كتب بابا . تعلمت نشد ستيلو وحدي ونبدا نكتب في أوراق لكتب نعاود في الجمل إلي نلقاهم في كل فراغ نلقاه فالصفحة... كبرت معايا حكاية لكتيبة .. غرام بتأليف لقصص فالإبتدائي في سنوات لولا و ثانية وثالثة و بعد شعر عند انستي صابرة وهذي عندي معها حكاية نحكيهلكم المرة جاية :) مبعد وقت التوجيه المدرسي  كنت نقرا في المعهد النموذجي بالقيروان وبمانو نموذجي يااااسر ماكانش عندنا إختيار الاداب خاطر في بلادنا شعبة الاداب و اللغة مازلت ماهيش برستيج كما قرية السسيونس بش تولي طبيب ولا فرمسين ولا دنتيست معروف. لاعلينا موضوع هذا زادة نجمو نحكيو فيه مرة أخرى. نرجع للكتيبة.. بالرغم مل توجه العلمي كنت ديمة  نحب نكتب أما لحاجة الغريبة اني كنت ديمة نحب كتيبتي ميقرها حتى حد ونخليها ونخبيها لروحي كهو. على قد ما نزيد نحب لكتيبة ونطور فيها على قد ما نخبي كتيبتي. نتفكر في لولا ثانوي وقتها مازلنا نقراو عربية كتبت أقصوصة وطلبت منا الاستاذة بش نعطيها كل واحد حاجة بش  ناخذو علاها عدد  للشفاهي. تشجعت وعطيتها الأقصوصة هذيكا. وبعد مقراتها ردت  فعلها زادت خلتني منحب نوري كتيبتي الحد. قتلي صحيت أما منين نقلتها هههه لتوى نتفكرها. المهم شنوا توا إلي خلاني نعمل البلوغ هذا ونكتب فيه ونحط كتيبتي بش إلي يحب يقرها يقر وحتى كي يكون أنسان ولا زوز كهو. هو اني رايي وكتيبتي وتجربتي ولا كلامي ينجم يأثر فيكم وفيا ينجم يعرفني على عباد كيفي وأكثر حاجة هي إنو بش يخليني نلتزم بالكتيبة وكي نبخل نرجع نكتب لنا. وحاجة أخرى زادة بش منخسرش كتابتي إلي كتبتها قبل وضاعت ومنعرش علاها .وين مشات في أوراق إلي تلوح والي  تقطع واللي تحرق واللي  الله أعلم وين مشى ..